Kandidati për kryeministër nga Lëvizja Vetëvendosje, Albin Kurti, ka mbajtur një konferencë për media pas përfundimit të zgjedhjeve.
Në fjalën e tij, Kurti tha se procesi zgjedhor ishte i lirë, demokratik dhe i ndershëm, duke e cilësuar rezultatin si një konfirmim për qeverisjen e tij.
“Jemi të parët, ky është një konfirmim për qeverisjen tonë të mirë, demokratike dhe progresiste. Koalicioni ynë fitues do ta formojë qeverinë e re,” tha ai.
Kurti theksoi se do të vazhdojnë me punët e nisura, duke shtuar se qytetarët kanë treguar se janë kundër oligarkëve.
“Kemi pasur premtime absurde nga opozita, të cilat kanë krijuar një atmosferë irracionale,” u shpreh ai.
Zgjedhjet e fundit kanë shënuar një garë të fortë mes partive kryesore, ndërsa rezultatet zyrtare pritet të shpallen së shpejti.
Sipas të dhënave Komisioni Qendror i Zgjedhjeve, janë numëruar 50.89% e votave, dhe deri më tani rezultatet janë:
Lëvizja Vetëvendosje (LVV) me 37.50% (166,031 vota)
Partia Demokratike e Kosovës (PDK) me 29.80% (131,940 vota)
Lidhja Demokratike e Kosovës (LDK) me 16.29% (72,138 vota)
AAK – Aleanca për Ardhmërinë e Kosovës dhe Nisma me 5.00% (35,073 vota)
Lista Serbe me 1.15% (10,104 vota)
Koalicioni për Familje me 1.09% (8,856 vota).
