Kryeministri i vendit, Albin Kurti bashkë me ministrin e Shëndetësisë kanë takuar me specializantët nga Presheva, Medvegja e Bujanoci, Shqipëria, Maqedonia e Veriut dhe Mali i Zi.
Kurti tha se bashkëpunimi për mbrojtjen dhe avancimin e të drejtave të shqiptarëve nuk është vetëm nevojë, por domosdoshmëri e kohës dhe obligim i qeverisë.
“Andaj, me këtë qëllim, përkushtimi ynë është i vazhdueshëm dhe sa vjen e do të rritet. Për më tepër buxheti i vitit të ardhshëm përsëri do të jetë edhe buxhet për shqiptarët e Luginës së Preshevës, Medvegjës dhe Bujanocit. Andaj, këtë po e vazhdojmë nga viti në vit dhe po ia shtojmë edhe një milion, krahasuar me vitin aktual pra, nga dy në tre milionë për vitin 2024 dhe kjo mbështetje është më e larta ndonjëherë”, tha Kurti.
Në takim u përmend edhe ndarja e mjeteve buxhetore për Mbështetje të Këshillit Nacional Shqiptar për të evokuar në qendrat e mëdha vendimmarrëse, ku janë ndarë 250 mijë euro për t’i pajisur nxënësit shqiptarë të shkollave fillore të Preshevës, Medvegjës dhe Bujanocit me tekste mësimore në gjuhën shqipe.
