Kryeministri i Kosovës, Albin Kurti, ka ndarë të dhënat e Agjencisë së Statistikave të Kosovës, sipas të cilave përgjatë muajit qershor të këtij viti është rritur për 29 për qind numri i vizitorëve në vend.
Kurti, me anë të një postimi në ‘Twitter’ ka vlerësuar se numri i turistëve që duan ta eksplorojnë natyrën dhe kulturën e Kosovës është në rritje.
“Këtë qershor numri i vizitorëve në Kosovë ka qenë gati 30% më i lartë se në muajin e njëjtë të vitit të kaluar. Vizitorët përfaqësojnë anëtarët tanë të diasporës dhe një numër gjithnjë në rritje turistësh që kërkojnë të eksplorojnë bukuritë dhe kulturën e vendit tonë”, deklaroi ai në ‘Twitter’.
Më herët kryeministri deklaroi përpara mërgimtarëve se është arritur progres i madh falë qeverisjes së tij.
“Gjatë këtyre dy viteve e katër muajve që u bënë në qeverisje, kemi arritur një përparim e sukses mbreslënës edhe në politikë e demokraci, por edhe në kulturë e ekonomi, andaj jemi krenarë me këto rezultate, të cilat padyshim janë bërë të mundura nga referendumi i 14 shkurtit të vitit 2021. Atëherë kur duke iu falënderuar edhe votës tuaj, shumica dërrmuese e popullsisë e votoi ndryshimin, e votoi Lëvizjen Vetëvendosje”, tha ai.
MINT në njoftimin e tyre thanë se Kosova po vazhdon e po bëhet gjithnjë e më atraktive për turistët, teksa krahasoi të dhënat e turistëve me vitin e kaluar.
