Dardan Krasniqi, i cili është aktivist i Lëvizjes Vetëvendosje, në një intervistë për RTV Dukagjini ka paralajmëruar se ai nuk do të jetojë më në Kosovë. Ai ka thënë se një veprim të tillë po e merr si pasojë e zhgënjimit me politikën, sistemin e drejtësisë dhe shëndetësisë.
Sipas Krasniqit, qytetarëve u është bërë barrë e rëndë për të jetuar në Kosovë si pasojë e tri çështjeve “padrejtësia e madhe, pa barazia e madhe dhe niveli i dobët i arsimit dhe shëndetësisë”.
“Fatkeqësisht më 28 të këtij muaji unë shkoj në Finlandë me frustrimin ma të madh dhe zhgënjimin ma të madh ndaj këtij vendi… dhe mendoj që pjesën tjerë të jetës ta kalojë në Finlandë”, ka thënë Krasniqi.
Më tej, Krasniqi ka treguar se ka marrë pjesë në tri lufta për shqiptarët; në luftën e Kosovës, të Preshevës dhe atë të Maqedonisë, dhe për shkak të kontributi të tij për Kosovën dhe shqiptarinë ai ka thënë se i dhimbet vetja që ta braktis vendin, por që ai më nuk po sheh shpresë në Kosovë.
“Unë e kam përjetuar tepër dhimbshëm. Është shumë e dhimbshme mirëpo, gjithë angazhimi dhe jeta jemi ka qenë, luftë, përplasje,…protesta… jetën se kam bë [nuk kam mundur ta shijojë në Kosovë]. Fatkeqësisht unë po iku se secili pushtet i pas luftës na ka diskriminuar, na i ka marrë të drejta elementare. Mua dhe pushteti [i Lëvizjes Vetëvendosje] për të cilin jam angazhuar ma ka marrë të drejtën elementare që është e garantuar në Kushtetutë mu ndje i barabartë në një konkurs ku aplikon”, ka thënë ai.
Sipas tij, CV-ja e tij peshon 5 kilogram dhe nuk ka arritur të punësohet edhe pse ka dy fakultete dhe një master, e shumë trajnime deri në FBI-ja të Shteteve të Bashkuar të Amerikës.
