Kryetari i Kryeqytetit, Përparim Rama, së bashku me nënkryetaren, Jehona Lushaku, sot kanë vizituar shkollat fillore “Faik Konica” dhe “Xhemajl Mustafa” në Prishtinë. Vizita e parë u zhvillua në shkollën “Faik Konica”, ku udhëheqësit komunalë patën mundësinë të shikojnë nga afër nisjen e mësimit gjithëditor në këto dy institucione arsimore, raporton PrishtinaPress.
Gjatë kësaj vizite, Kryetari Rama dhe Nënkryetarja Lushaku u takuan me drejtorët e shkollave, mësuesit dhe nxënësit për të diskutuar rreth infrastrukturës dhe përmirësimeve të bëra për të mbështetur këtë format të ri të mësimdhënies. Ata theksuan rëndësinë e mësimit gjithëditor si një hap i rëndësishëm për përmirësimin e cilësisë së arsimit dhe përgatitjen më të mirë të nxënësve për të ardhmen.
“Ne jemi të angazhuar që të ofrojmë kushte më të mira mësimi për nxënësit tanë. Mësimi gjithëditor është një hap revolucionar që do t’i ndihmojë nxënësit të përfitojnë më shumë nga procesi arsimor,” tha Kryetari Rama gjatë vizitës.
Në anën tjetër, nënkryetarja Lushaku theksoi rëndësinë e bashkëpunimit ndërmjet institucioneve arsimore dhe komunës për të siguruar që mësimi gjithëditor të jetë sa më efektiv dhe i suksesshëm.
