Kryeprokurori i Prokurorisë Themelore në Prishtinë, Zejnullah Gashi është takuar sot me Drejtoreshën e Byrosë për Çështjet Ndërkombëtare të Narkotikëve dhe Zbatimit të Ligjit, Tamara Graig, shefen e Seksionit Politik, Bridget Trazoff, dhe specialisten e Programeve të INL-së, Dafina Bardhi Rexhepin.
“Kryeprokurori Gashi fillimisht i njoftoi pjesëmarrëset në këtë takim lidhur me strukturën organizative të Prokurorisë Themelore në Prishtinë, të arriturat dhe sfidat me të cilat përballet kjo prokurori, duke theksuar edhe mbështetjen e madhe që është dhënë përmes programeve të ndryshme të Ambasadës së Shteteve të Bashkuara të Amerikës në Kosovë, në tejkalimin e këtyre vështirësive”, thuhet në njoftimin e Sistemit Prokurorial.
Në këtë takim, Gashi ka folur për angazhimin e institucionit të tij në efikasitet dhe transparencë në punën prokuroriale, dhe falënderoi Ambasadën e Shteteve të Bashkuara të Amerikës për mbështetjen e vazhdueshme.
“Gjatë këtij takimi, Kryeprokurorit Gashi theksoi angazhimin e institucionit që drejton në rritjen e efikasitetit dhe transparencës në punën prokuroriale, ndërsa përfaqësueset nga Departamenti Amerikan i Ambasadës së SHBA-ve në Kosovë nënvizuan arritjet ndër vite të sistemit prokurorial në maturimin institucional, ngritjen e standardeve profesionale dhe ngritjen e efikasitetit në ushtrimin e detyrave prokuroriale”.
“Në fund të takimit, Kryeprokurori Gashi falënderoi të pranishmet për vizitën në Prokurorinë Themelore në Prishtinë, si dhe shprehu mirënjohjen e tij për mbështetjen e vazhdueshme të Ambasadës së Shteteve të Bashkuara të Amerikës dhënë sistemit prokurorial në përgjithësi, dhe Prokurorisë Themelore në Prishtinë në veçanti”.
