Figura e profesorit, publicistit dhe gazetarit Ramiz Kelmendi është vlerësuar lart nga krerët e shtetit, profesorë, akademikë dhe persona të jetës publike.
Në mbledhjen komemorative për profesorin e ndjerë Ramiz Kelmendi kanë marrë pjesë kryeministri Isa Mustafa, kryeparlamentari Kadri Veseli, ish-presidentja e Kosovës, Atifete Jahjaga, akademikë, profesorë e familjarë.
Kryeministri i Kosovës Isa Mustafa, shprehu ngushëllimet më të sinqerta duke thënë se shteti i Kosovës ka humbur një njeri të dijes, e një gazetar të madh.
“Populli i Kosovës i është mirënjohës që Ramizi pas vetes la shume gazetarë e njerëz të zotë”, tha Mustafa.
Ndërsa, kryetari i Kuvendit të Kosovës, Kadri Veseli, tha se Kosova ka humbur një intelektual i cili me përkushtim shumë të madh punoi për vendin.
Ai tha se si Kelmendi la shenja në rrugën kulturore e arsimore, si shkrimtar, publicist e gazetar.
Ndërsa, djali i profesor Kelmendit, Migjeni, tha se aftësia e babait të tij ka qenë dashuria ndaj njerëzve dhe respekti për ta.
“Babën e përkufizon fjala dashni”, tha Kelmendi.
