Deputetja e Lidhjes Demokratike të Kosovës, Rrezarta Krasniqi, ka deklaruar se mosshkuarja e zëvendëskryeministrit Besnik Bislimi për raportim në Komision është arsye e dështimit të mbledhjes së Komisionit për Integrime dhe jo mungesa e kuorumit.
Krasniqi i ka quajtur shpifje deklarimet e Qeverisë se mungesa e kuorumit ia pamundësoi raportimin Bislimit.
“Zëvendëskryeministri Besnik Bislimi refuzoi të marrë pjesë për raportim në Komisionin për Integrim Evropian, duke i ikur përgjegjësisë kushtetuese”, ka shkruar ajo.
Ajo tha se deklarimet se mos-ardhja e tij ishte si rezultat i mungesës së kuorumit janë shpifje dhe manipulim, dhe se ata që nuk ishin prezent i takojnë partisë në pushtet.
“Kjo është e vërteta e vetme, ndërsa deklarimet se mos-ardhja e tij ishte si rezultat i mungesës së kuorumit janë shpifje dhe manipulim. Ata që nuk ishin prezent i takojnë partisë në pushtet. Tani del se gjithçka ka qenë mirë e organizuar nga ta, për të pamundësuar raportimin, sepse duan ta fshehin para qytetarëve se kush në të vërtetë janë ata dhe në çfarë janë të angazhuar. Mashtruesit mbesin mashtrues”, ka shkruar Krasniqi.
