Kombëtarja e Kosovës U22, femrat, ka mbyllur ndeshjen e parë në kuadër të kualifikimeve të Kampionatit Evropian për këtë grupmoshë, i cili po zhvillohet pikërisht në Çeki.
Vashat “Dardane” patën punë të vështirë ndaj nikoqirit të garës, Çekisë, e cila ishte jashtëzakonisht e motivuar për lojë, marrë parasysh edhe faktin se po luante në terren të vetë, raportoi Federata e Volejbollit e Kosovës.
Kosova pësoi disfatë me rezultat 3-0 (25-9, 25-20, 25-12), duke treguar paraqitje dinjitoze në setin e dytë, të cilin e humbi me pesë pikë diferencë.
Vashat tona do të kenë më pak se 24 orë kohë të lënë prapa këtë disfatë, pasi, nesër me fillim nga ora 16:00 i pret testi tjetër shumë i vështirë, kundër Turqisë.
