Shifra alarmante të ndotjes së ajrit janë regjistruar dy ditët e fundit në Prishtinë. Ajri në kryeqytet cilësohet si i rrezikshëm për shëndetin. Nuk po zbatohet ndonjë strategji e cila do të ndikonte në përmirësimin e jetës së qytetarëve. Ndërkohë nuk ka ndonjë reagim nga MMPH.
Gjashtë zëvendësministra të Ministrisë së Mjedisit dhe Planifikimit Hapësinor nuk kanë prezantuar ndonjë plan për përmirësimin e ajrit në kryeqytet.
Fatmir Matoshi, Bashkim Musliu, Aleksander Spasic, Milena Zdravkovic, Kurtan Kajtazi dhe Besim Demi janë të gjashtë zëdhënësit e ministres Albena Reshitaj.
Nuk ka as reagim nga ana e tyre ndaj shqetësimit në rritje nga ana e qytetarëve për ajrin në të cilin po rrisin fëmijët.
Prej kohësh Prishtina kryeson listën e qyteteve botërore me ajrin më të ndotur por kjo nuk ka ndikuar në marrjen e masave të zbatueshme që do të ndikonin në të mirë të jetës së qytetarëve.
Mbrëmja e djeshme u cilësua e tmerrshme e shifra më të mira nuk ka as sonte. Bazuar në matjen e bërë nga Qendra për matjen e cilësisë së ajrit e vendosur nga Ambasada Amerikane në Prishtinë, sonte në orën 22:00 vlera e ndotjes ka arritur në 414 dhe konsiderohet e shumë e rrezikshme.
Ministrja Albena Reshitaj e kontaktuar nga Express nuk është përgjigjur me arsyetimin se ndodhet jashtë vendit.
Kryeministri Ramush Haradinaj është kritikuar vazhdimisht për numrin e madh të zëvendësministrave në kabinetin e tij qeveritar.
Ai gjithmonë është arsyetuar me faktin se të gjithë të emëruarve në këto pozita ‘do tu gjeje punë’.