Delegacioni i Kosovës dhe ai i Serbisë të cilët ishin mbledhur të hënën në Bruksel për të vazhduar dialogun, u kthyen menjëherë të martën në shtetet e tyre.
Vrasja e politikanit serb në veri të Mitrovicës, Oliver Ivanoviq, ishte shkak i ndërprerjes së dialogut Kosovës-Serbi në këtë ditë.
Mirëpo, menjëherë pas kësaj Bashkimi Evropian ka bërë thirrje që dialogu të vazhdohet sa më shpejt.
Për këtë janë pajtuar edhe presidenti i Kosovës, Hashim Thaçi dhe ai i Serbisë, Aleksandar Vuçiq, të cilët gjatë një bisede telefonike ishin dakorduar se vazhdimi i dialogut është mënyrë më e duhur për normalizimin e marrëdhënieve në mes të këtyre vendeve.
Kështu, këtë e ka mirëpritur përfaqësuesja e lartë e Bashkimit Evropian, Maja Koçijançiq e cila sot gjatë ditës ka bërë thirrje që të vazhdojë sa më shpejt dialogu.
Në lidhje me këtë, kreu i delegacionit kosovar, Avni Arifi ka thënë se ata përkrahin idenë e Koçijançiq dhe pajtohen që dialogu të ndodh sa më shpejt.
“Këto data i cakton BE. Në e përkrahim idenë e Koçijançiq dhe pajtohemi që dialogu të ndodh sa më shpejt.”, ka thënë Arifi.
Sipas tij, Kosova ende i ka gati valixhet që nga vizita e fundit në Bruksel.
“Ne jemi të gatshëm, veç le të na tregojnë se kur. Ne ende biletat i kemi të gatshme dhe ende çantat nuk i kemi ç’paketuar. Kështu që kur donë le të na lajmërojnë”, ka shtuar ai.