Qeveria e Kosovës dhe zyra e Kombeve të Bashkuara për Shërbime të Projekteve – UNOPS, kanë nënshkruar të mërkurën një memorandum mirëkuptimi për regjistrimin e popullsisë, banesave dhe ekonomive familjare në Kosovë,
Ky projekt do të zbatohet nga Agjencia e Statistikave e Kosovës (ASK) dhe pritet të nisë në vitin 2021.
Sipas memorandumit të nënshkruar, Agjencia e Statistikave të Kosovës do ta zbatojë projektin në bashkëpunim të ngushtë me UNOPS-in, i cili do të menaxhojë fondin e krijuar për mbulimin e shpenzimeve të aktiviteteve të këtij projekti.
Zëvendëskryeministri i Republikës së Kosovës, Enver Hoxhaj tha se ky proces është me rëndësi kapitale, dhe se sipas tij, duhet një angazhim i të gjithëve që ky proces të realizohet me profesionalizëm të lartë dhe sipas standardeve ndërkombëtare.
“Zyra ime në bashkëpunim të ngushtë me ASK dhe UNOPS-in do të bëjnë përpjekje të përbashkëta për sigurimin e mjeteve të nevojshme për implementimin e suksesshëm dhe pa pengesa të projektit”, ka shtuar Hoxhaj.
Regjistrimi i fundit i popullsisë në Kosovë është bërë në vitin 2011.
Sipas rezultateve përfundimtare të këtij regjistrimi numri i banorëve që jetojnë në territorin e Kosovës, duke përjashtuar komunat, Leposaviq, Zubin Potok, Zveçan dhe pjesën veriore të Mitrovicës ishte 1.739.825.