Kryetari i Kuvendit, Glauk Konjufca e ka cilësuar masakrën në Burgun e Dubravës, si aktin më të shëmtuar që Serbia bëri në Kosovë.
Konjufca ka theksuar se burgu është institucioni më i lartë i shtetit dhe se 1 mijë të burgosur u grumbulluan aty qëllimisht për t’u masakruar.
“Jemi këtu për ta kujtuar aktin më të shëmtuar që e bëri Serbia. Burgu është si institucion për nga definicioni, si 100 për qind që kontrollohet prej shtetit dhe këtu 1 mijë të burgosur ishin në dorën e Serbisë dhe ata u grumbulluan dhe u vranë e u masakruan”, tha kryekuvendari.
Tutje, Konjufca tha se për rastin në fjalë përgjegjëse mbetet Serbia por që ende s’ka drejtësi.
“I shoh edhe familjarët që për 24 vjet jetojnë me peshën e padrejtësisë. Kur është puna për UÇK po ka drejtësi e për forcat paramilitare serbe, me përgjegjësi të qartë që dihet për gjithë fushatën e gjenocidit që e ka bërë në Kosovë, nuk po ka drejtësi”, tha Konjufca.
