Një operacion policor është zhvilluar sot në një zyre që është ngjitur me hyrjen e stacionit policor “Qendra” në Prishtinë, ku dyshohet se është zhvilluar veprimtari e kundërligjshme.
Lajmi tashmë është konfirmuar edhe nga Prokuroria, përmes një komunikate të përbashkët me Policinë e Kosovës.
Sipas njoftimit, në objektin e bastisur dyshohet se janë duke u ofruar shërbime të kundërligjshme mjekësore.
“Prokuroria Themelore në Prishtinë, njofton opinionin publik se nën udhëheqjen e Prokurorit të Shtetit në koordinim me Policinë e Kosovës, Drejtorinë për Hetime Rajonale në Prishtinë, është duke u realizuar bastisje në një objekt në qendër të Prishtinës, ku dyshohet se janë duke u ofruar shërbime të kundërligjshme mjekësore në këtë objekt.”
