Komuna e Skenderajt ka qenë njëra prej komunave më të prekura nga përmbytjet e 19 janarit.
Donarti, 5-6 vjeçar pasi kishte pushuar shiu, ishte fotografuar me një lopatë teksa bënte përpjekje për të pastruar bërllokun që kishin sjellur përmbytjet.
Fotografia e tij u bë virale në rrjetet sociale.
Të mërkurën, kryetari i Skenderajt, Fadil Nura, veprimin e tij e kishte cilësuar si inspirim dhe shembull pozitiv.
Nura, ka shpërblyer Donartin me 1.000 euro si dhe mirënjohje për veprimin e bërë.
“Djaloshi hero me lopatë në dorë që po përpiqej pas vërshimeve të pastrojë rrëmujën e krijuar nga fatkeqësia natyrore, për t’u bërë inspirim i ynë dhe frymëzim i shembullit pozitiv se, pas gjithë asaj çfarë na ndodhi, ne bashkërisht do të RINGRIHEMI”, shkroi Nura.
Ditë më parë, kreu i Skenderajt, ka njoftuar se iu janë drejtuar Agjencionit për Menaxhimin e Emergjencave dhe Komisionit Qendror të Qeverisë për kompensimin e dëmit në vlerën e 12,203,029.29 eurove.
Nura ka deklaruar se 372 familje janë prekur nga vërshimet e 19 janarit.
Po ashtu Komuna e Skenderajt hapi një fond për dëmet e shkaktuara nga vërshimet.
