Drejtori i Inspeksionit në Komunën e Pejës, Leutrim Murtezaj ka thënë se do të merren masa ndaj qytetarëve të cilët frekuentojnë Grykën e Rugovës në Komunën e Pejës.
Një lajm të tillë drejtori Murtezaj e ka bërë të ditur për “Betimi për Drejtësi”.
Ai ka shtuar se inspektorët në Grykën e Rugovës kishin parë një masë të madhe të njerëzve, për çka sot janë paralajmëruar se ndaj tyre në të ardhmen do të ndërmerren masa.
“Ende nuk është paraparë masa ndëshkimore ndaj tyre mirëpo në bashkëpunim me policinë dhe prokurorinë kemi me ndërmarra masa me qëllim të parandalimit të kësaj dukurie, se ka informata sipas inspektorëve dhe policisë, numër i madh i qytetarëve po del. Nesër kemi mu marrë më shumë me këtë dhe përmes policisë do të ndërmarrim masa për mos me leju me shku naltë”, ka thënë Murtezaj.
Ndryshe, në faqen zyrtare të Komunës së Pejës është konstatuar se mijëra qytetarë janë duke e frekuentuar Grykën e Rugovës, duke e cilësuar si veprim të qytetarëve që bie në ndesh me vendimin e Qeverisë për parandalimin e virusit.
“Sot ishim në monitorim në Grykën e Rugovës. Pamë me mijëra qytetarë që kishin dal në piknik! Ishin në grupe nga 5, 10 e 15 persona. Ishin familjarë, grupe rinore e grupe të moshuarish! Duke e pasur parasysh situatën që ndodhemi, kjo që pamë ishte një situatë jo e mirë. Kjo që pamë është sjellje plotësisht e gabuar, në kundërshtim me vendimet e qeverisë. Kjo sjellje kontribuon në fuqishëm në shpërndarjen e virusit, rrjedhimisht ka pasoja me infektimin e personave dhe rrezikimin e jetës së qytetarëve! Kjo situatë nuk duhet të përsëritet”, thuhet në njoftimin e Komunës së Pejës. /BetimipërDrejtësi/