Media ruse RIA Novosti publikoi një tekst të gjatë se si “Beogradi i dha një mësim Rusisë”, në të cilin autori David Narmania iu referua akuzave për dërgimin e armëve serbe në Forcat e Armatosura të Ukrainës.
Narmania shkruan për RIA Novosti se shkak për këtë tekst është deklarata e presidentit serb Aleksandar Vuçiq, i cili tha se armët e prodhuara në Serbi mund të përfundojnë në duart e Forcave të Armatosura të Ukrainës.
“A është e mundur të ndodhë kjo? Nuk ka dyshim. A kemi alternativë? Për të mos prodhuar (armë)? A nuk duhet të shesim?”, tha Vuçiq.
E njëjta temë u shfaq në fund të shkurtit: më pas doli se granatat serbe M-21 për MLRS Grad po dorëzoheshin në Forcat e Armatosura të Ukrainës. Sigurisht, jo drejtpërdrejt, por përmes Turqisë, e cila ia shet Sllovakisë, e cila ia shet Ukrainës.
Në një intervistë të re, Vuçiq theksoi gjithashtu se Beogradi do t’i bashkohet ndalimit të rishitjes së teknologjisë me qëllime të dyfishta në Moskë.
“Ne nuk do të jemi një qendër për rieksportin e asgjëje në Rusi,” tha ai.
“Vuçiq nuk është Erdogan”
Siç shkruan Narmania, ka ardhur koha për të stigmatizuar tradhtarin, por ka disa “por” të rëndësishme.
Gjegjësisht, ai sqaron se Serbia është gjendur në kthetrat e atyre që i dëshirojnë dëm dhe se duan ta shënojnë si aleatin e fundit rus në Evropë. Ai kujton edhe përshkallëzimin në Kosovë, duke deklaruar se është pasojë e pozitës së pambrojtur të Beogradit.
“Ne kemi një partner që para fillimit të operacionit special ushtarak (siç e quan Rusia luftën në Ukrainë), u ul me mjeshtëri në dy karrige, duke bashkëpunuar me Moskën dhe Brukselin. Por Vuçiq nuk është Erdogan dhe Serbia nuk është Turqi, kështu që në kushtet aktuale hapësira e manovrimit të Beogradit është ngushtuar në madhësinë e një gjilpëre”, shkruan Narmania.
Ai shton se qëllimi i perëndimit ishte dëbimi i rusëve nga Evropa dhe se ishte vetëm çështje kohe kur ata do ta tërhiqnin Serbinë nga orbita ruse. Ai përfundon se fjalët e mëdha si “miq” dhe “vëllezër” në politikën ndërkombëtare mund të përdoren vetëm në thonjëza, sidomos në këtë periudhë të vështirë.
