Komiteti Olimpik i Kosovës ka organizuar për herë të dytë Festivalin Ndërkombëtar të Filmit Sportiv “Prishtina 2022”.
Festivali u mbajt për dy ditë në kinemanë ABC në Prishtinë.
Gjithsej u shfaqën 15 filma (dokumentarë të zhanreve të ndryshme) vendorë dhe ndërkombëtarë.
Në ceremoninë hapëse u shfaq dokumentari i realizuar nga KOK-u, “Kosova e Artë”, që iu dedikua kampioneve olimpike Tokio 2020, Distria Krasniqi dhe Nora Gjakova.
Në hapje morën pjesë edhe Gjakova, trajneri me tri medalje të arta olimpike, Driton Kuka, ambasadorë të shteteve të huaja si Japonia, Hungaria, Kroacia, Maqedonia e Veriut, etj, përfaqësues të federatave sportive, sportistë, ish-sportistë, gazetarë etj.
Presidenti i KOK-ut, Ismet Krasniqi, duke folur për Festivalin dhe në veçanti për dokumentarin, theksoi se suksesi historik dhe madhështor i arritur në Tokio 2020, meritonte të pasqyrohej në një dokumentar të tillë, me të cilin do të aplikohet për të fituar edhe çmim ndërkombëtar në Festivalin Botëror të Filmit Sportiv “Milano 2022”.
Përmes një video-mesazhi, organizimin e Festivalit e vlerësoi edhe Presidenti i Federatës i Federatës Ndërkombëtare të Kinematografisë Sportive (FICTS), Franco Ascani, anëtare e së cilës është KOK-u.
Kampionia olimpike, Nora Gjakova, deklaroi se ky dokumentar duhet të jetë edhe insipirim për sportistët e rinj.
Në ditën e dytë, pati kryesisht filma ndërkombëtarë, ndërsa u shfaqën edhe dokumentarët vendorë “Përtej Ëndrrës” nga “OM Production”, dedikuar atletit Muhamet Ramadani, si dhe “Një çerek-shekulli rrugëtim” nga autori Arben Berisha dhe “Pranimi i Kosovës në UEFA, hapja e dyerve të mëdha të futbollit”, nga autori Bujar Mehmeti, të dy dedikuar rrugëtimit të ndërkombëtarizimit të futbollit kosovar.
Festivali u organizua në bashkëpunim me FICTS-in./Prishtinapress/
