Shkruan: Prof.Dr. Shyqyri Haxha
Në një kohë turbulencash të mëdha globale, lidershipi shqiptar, si në Kosovë, ashtu edhe në Shqipëri, duhet të përgatitet për më të keqen! Ka rrezik real që kjo situatë ndërkombëtare e paqëndrueshme të nxjerrë shqiptarët në pozita të pafavorshme, me pasoja të mundshme si humbja e territoreve apo përfshirja në aleanca të gabuara. Kjo fazë e re e riformatimit të rendit botëror kërkon një qasje të bashkërenduar dhe vizionare nga udhëheqësit shqiptarë në të gjitha trojet Shqiptare.
Historikisht, shqiptarët janë bashkuar vetëm në momente të krizave të mëdha dhe luftrave ad-hoc, gjithmonë në mënyrë të pakoordinuar, dhe kjo ka sjellë humbje të mëdha, veçanërisht territoriale. Tani është momenti për reflektim dhe bashkërendim strategjik.
Fatkeqësisht, në vend të patriotizmit të vërtetë, sot shpesh lavdërohen ata që “luftojnë” për partinë dhe liderin, jo për shtetin dhe kombin. Ky është një mentalitet i trashëguar nga komunizmi, që edhe pas 25 vitesh “demokraci” po vazhdon të ngulfatë progresin dhe pavarësinë reale të institucioneve.
Qeveria e Kosoves, pa marrë parasysh kush e formon atë, duhet të tregojë vigjilencë dhe përgjegjësi historike. Në pozita kyçe duhet të vendosen njerëz kompetentë, me integritet dhe kredibilitet, të cilët nuk i shërbejnë partisë, por shtetit. Kryeministri duhet të rrethohet me profesionistë dhe mendje të ndritura, jo me “yes man” dhe servilë që çdo mëngjes i “përulen” për lavdërime boshe dhe retorikë populiste për konsum partiak apo medial.
Sektorët më të rëndësishëm të shtetit si mbrojtja, ekonomia, arsimi dhe diplomacia kërkojnë figura me ide të qarta, strategji afatgjata dhe mendësi zhvillimi, jo ‘sherbetor partiak’ politikë. Pa këtë qasje, shteti nuk do ecë përpara, përkundrazi, do të dështojë për të disatën herë.
Koha ka treguar se të gjithë ata liderë që kanë menduar vetëm për interesat e tyre personale e tyre dhe për partinë, kanë përfunduar duke dëmtuar institucionet, kombin, dhe në fund edhe veten. Në një ambient toksik të krijuar nga partitë politike për të kapur timonin e qeverisjes, është vështirë të bëhen ndryshime të mëdha, por ky trend duhet të ndryshojë.
Dhe mbi të gjitha: Kombi është mbi gjithçka. Jo partia. Jo lideri. Partitë dhe liderët vijnë dhe shkojnë, kjo është natyra e politikës. Por substanca kombëtare, shteti dhe institucioni duhet të mbijetojë, të forcohet, dhe të përcillet brez pas brezi. Vetëm një shoqëri që e vendos interesin kombëtar mbi interesat e ngushta partiake ka të ardhme dhe dinjitet.
Shqiptarët kanë paguar çmim të lartë për mungesë vizioni dhe përçarje të brendshme, dhe do të paguajm përsëri.
