Mediumi boshnjak Klix.ba ka hedhur disa dyshime pas një deklarate të mbrëmshme të kryeministrit të Kosovës Albin Kurti.
Kryeministri Albin Kurti ka zbuluar detaje të panjohura më parë për takimin e fundit me Aleksandar Vuçiqin në Bruksel, në kuadër të dialogut për normalizimin e marrëdhënieve.
Kurti mbrëmë ka thënë se Vuçiq është i fiksuar pas ish-komandantit suprem të UÇK-së, Adem Jasharit.
Është kjo deklaratë për të cilën mediumi boshnjak thotë se ishte mesazh i qartë që presidenti serb ia dha Kosovës.
Sipas Klix.ba, Vuciq në njëfarë forme e kishte paralajmëruar sulmin që ndodhi të dielën në Banjskë ku mbeti i vrarë një polic i Kosovës dhe tre terroristë serbë.
Kurti tha më 24 shtator (ditën e sulmit terrorist në Kosovë), ai ka dashur ta kthejë manastirin ortodoks të Banjskës në “kullën e Jasharëve” për serbët e Kosovës, përkatësisht si vend të martirizimit të tyre. Kujtojmë se sulmuesit së fundmi janë fshehur në atë manastir.
Por Vuçiq, sipas Kurtit shkoi edhe më tej.
Kryeministri Kurti në një takim në Bruksel më 2 maj ka thënë se Vuçiq ka përmendur se Milan Radoiçiq do të bëhet Adem Jashari i Serbisë.
“Por duke qenë diktator, ai nuk e kupton historinë: epikat dhe çlirimi nuk shpiken apo kopjohen”. Kosova është vend demokratik dhe properëndimor. Serbëve në Kosovë nuk u nevojitet çlirimi nga Republika e Kosovës, por nga veglat terroriste të Serbisë”, tha Kurti.
Fjala vjen, komandanti i UÇK-së Jashari u vra në masakrën në Prekaz. Ishte një operacion i policisë serbe i kryer më 5 mars 1998, gjatë të cilit në Prekaz u vra lideri i Ushtrisë Çlirimtare të Kosovës, Adem Jashari së bashku me mbi 50 anëtarë të familjes së tij.
Në Prekaz, përveç pjesëtarëve të UÇK-së, janë vrarë edhe një numër i madh i grave, fëmijëve dhe pleqve. Masakra në Prekaz konsiderohet si një nga seritë e masakrave në zonën e Drenicës, të cilat janë kryer nga forcat e sigurisë serbe gjatë luftës në Kosovë.
Institucionet kompetente në Kosovë kanë mbledhur prova që implikojnë nënkryetarin e Listës Serbe, Milan Radoiçiq, si lider të grupit terrorist që sulmoi policinë e Kosovës, gjatë të cilit humbi jetën rreshteri Afrim Bunjaku.
Radoiçiq është nën sanksione si nga Shtetet e Bashkuara të Amerikës ashtu edhe nga Britania e Madhe, transmeton Klix.