“Misioni i KFOR-it nuk është konsultuar gjatë aksionit të djeshëm nga forcat speciale të Policisë së Kosovës në katër komuna në veri. Ne jemi duke monitoruar situatën dhe jemi në gatishmëri, të gatshëm për të ndërmarrë të gjitha masat e nevojshme për të përmbushur mandatin tonë të OKB-së”, thuhet në përgjigjen me shkrim të KFOR-it për Kosovo Online.
“KFOR po monitoron situatën dhe mbetet vigjilent. Është në një pozicion të mirë për të marrë të gjitha masat e nevojshme për të vazhduar përmbushjen e mandatit të saj në OKB dhe për t’iu përgjigjur çdo zhvillimi të mëtejshëm përkatës”, theksohet në përgjigje.
Shtohet se KFOR vazhdon të mbështesë dialogun ndërmjet Kosovës dhe Serbisë me mbështetjen e BE-së, duke ofruar kornizën e sigurisë të nevojshme për përparimin e diplomacisë.
“Kjo është mënyra e vetme për të zgjidhur çështjet e pazgjidhura dhe për të arritur zgjidhje që respektojnë të drejtat e të gjitha komuniteteve”, thuhet në përgjigje.
Ata shtuan se presin konsultime me kohë për çdo veprim të Policisë së Kosovës apo të FSK-së që mund të ndikojë në siguri.
“Veprimet nuk janë konsultuar apo koordinuar në mënyrë adekuate me KFOR-in. KFOR pret koordinimin me kohë të çdo veprimi nga Policia e Kosovës apo Forcat e Sigurisë së Kosovës që mund të ndikojë në siguri”, theksohet në përgjigje.
Në vazhdim të përgjigjes, kujtohet se KFOR-i vazhdon të zbatojë mandatin e tij bazuar në Rezolutën 1244 të Këshillit të Sigurimit të OKB-së nga viti 1999 për të siguruar një mjedis mbrojtës dhe të sigurt për të gjitha komunitetet që jetojnë në Kosovë dhe lirinë e lëvizjes – në çdo kohë dhe në mënyrë të paanshme.
Kujtohet se KFOR-i është përgjigja e tretë e sigurisë, pas Policisë së Kosovës dhe Misionit të BE-së për Sundimin e Ligjit (EULEX), me të cilët janë në bashkëpunim të ngushtë.