Ardita Sinani, këshilltarja e kryeministrit Albin Kurti për Luginë të Preshevës, ka kërkuar që rreshtimi i Serbisë me Evropën të vlerësohet edhe me demokracinë e brendshme dhe të drejtat e minoriteteve.
Në Ditën e Evropës, ajo ka thënë Serbia po rrëshqet drejt institucionalizimit të gjuhës së urrejtjes ndaj pakicave dhe mohimit të krimeve të luftës.
Në profilin e saj në “Facebook”, ajo ka shkruar se BE-ja nuk duhet të pranoj në gjirin e saj vende që nuk janë demokratike.
“Në Serbinë e sotme, Dita e Evropës, 9 maji, ka veçantinë e saj jo vetëm me pjesëmarrjen e sotme të ministrave të Qeverisë së Serbisë në manifestime të përbashkëta me zyrtarët lokal rus, ku jehon parulla: “Rroftë Putini!”. Serbia po rrëshqet drejt institucionalizimit të gjuhës së urrejtjes ndaj pakicave, revizionizmit historik dhe mohimit të krimeve të luftës”, ka shkruara ajo.
Sipas saj, BE-së nuk i duhet një kalë i trojes ruse brenda saj.
“Siç u dëshmua së fundi, çdo ditë e më shumë po ulet mbështetja për Bashkimin Evropian në Serbi. Perëndimi nuk duhet të gaboj për të pranuar vende të reja që nuk janë demokratike. BE-së nuk i duhet një kali të trojes rus brenda saj. Dita e Evropës në Serbinë e sotme karakterizohet me mungesën e demokracisë dhe respektimit të të drejtave të minoriteteve, sipas vlerave evropiane. BE-së nuk i duhet një Serbi që shkel të drejtat e pakicave. E këtu veçohet shtypja e diskriminimi shtetëror ndaj Luginës së Preshevës dhe shqiptarëve në Serbi”, ka shkruar ajo.
