Policia e Kosovës gjatë një operacioni dje në Komoran të Drenasit ka arrestuar dy persona të dyshuar dhe ka konfiskuar 31 kg substancë e dyshuar narkotike e llojit marihuanë.
Operacioni policor është ndërmarr pas pranimit të informacioneve dhe hetimeve të zhvilluara nga njësia rajonale e Drejtorisë për hetimin e trafikimit me narkotik në Prishtinë, në konsultim dhe bashkëpunim me Prokurorinë Themelore në Prishtinë.
Në këtë operacion është konfiskuar vetura “Passat” me targa vendore pronë e të dyshuarit mashkull kosovar, në të cilën janë gjetur dhe konfiskuar dy thasë të mbushur me 31 kilogramë substancë e dyshuar narkotike e llojit marihuanë.
Po ashtu është konfiskuar edhe një veturë me targa të Shqipërisë e personit të dyshuar mashkull shtetas i Shqipërisë, dy telefona celularë, 1050 euro dhe 13500 lekë.
Me urdhër të prokurorisë është realizuar edhe një bastisje në lokacionin e të dyshuarit mashkull kosovar dhe është sekuestruar edhe një veturë tjetër, e tretë, në të cilën janë gjetur mbetje të vogla të substancave narkotike.
Personat e arrestuar me vendim të Prokurorit kujdestar janë dërguar në mbajtje për procedura të mëtejme.
