Hetuesi policor Jeton Jetullahu në cilësinë e dëshmitarit, ka deklaruar se kallëzimin penal ndaj të akuzuarës Ikballe Berisha-Huduti e ka ngritur duke u mbështetur në postimet e saj në rrjetin social “Facebook”.
Këtë deklaratë dëshmitare Jetullahu e ka dhënë në seancën e së martës, në gjykatën Themelore në Prishtinë, në rastin ku Berisha-Huduti po akuzohet se kishte bërë thirrje për hakmarrje ndaj autoriteteve amerikane të cilët kishin realizuar një sulm në Irak, ku kishte mbetur i vrarë gjenerali dhe udhëheqësi i gardës revolucionare të Iranit, Qassem Solejmani, raporton “Betimi për Drejtësi”.
Gjatë dhënies së dëshmisë së tij, dëshmitari Jetullahu ka thënë se me 4 janar 2020, nëpërmjet rrjetit social “Facebook”, e akuzuara Huduti në profilin e saj kishte postuar shkrimin që u përdor për hartimin e kallëzimit penal.
Jetullahu ka lexuar postimin e Hudutit ku bënte thirrje për hakmarrje ndaj dy vrasjeve që kishin ndodhur në Iran nga autoritetet amerikane.
“Populli Irakian doli në rrugët e Irakut menjëherë pas krimit amerikan, për të dënuar ashpër padrejtësinë që iu bë dy figurave eminente në Irak e Iran dy gjeneralët të tyre Gjeneral Sylejmani dhe Gjeneral Ebu Mehdi Muhendisi. Zoti i dhashtë durimin ngase të mbysësh Zotin e shtëpisë i ke mbytë tërë anëtarët e shtëpisë, e pastaj hakmarrja është obligim, por nuk ka kufi”.
Dëshmitari Jetullahu ka thënë se pas pranimit të këtyre mesazheve e kishte përpiluar kallëzim penal këtë rast dhe të njëjtin e kishte dërguar në Prokurorinë Speciale, më 6 janar 2020.
Tutje, dëshmitari ka thënë se pas pranimit të urdhëresës, të njëjti kishin bastisur shtëpinë e të akuzuarës Berisha-Huduti, ku edhe kishin sekuestruar, një USB, një llaptop, një telefon mobil dhe dy fletore me shënime.
Ai tha se pas analizimit të këtyre pajisjeve, nga telefoni i të akuzuarës Berisha-Huduti ishin gjetur dëshmi se e akuzuara ka bërë postimet e lartpërmendura dhe disa postime tjera që lidhjen me vrasjen e gjeneral Sylejmanit, për të cilat tha se janë të bashkangjitur në raport.
Po ashtu dëshmitari ka thënë se gjatë një komunikimit me “Whats app” me Bujar Rugoven e akuzuara i kishte thënë se “shiko se çfarë bombe kamë qit në Facebook”.
Ndërsa në pyetjen e kryetarit të trupit gjykues gjykatësit, Vesel Ismajli se a e keni ngrit kallëzimin penal mbështetur në thënien e të akuzuarës “shiko se çfarë bombe kamë qit në facebook”, dëshmitari Jetullahu ka thënë se kallëzimin penal e ka ngritur duke u mbështetur në postimit e lartcekura, e jo nga kjo thënie.
Pas dëgjimit të dëshmitarit, mbrojtësja e të akuzuarës Berisha-Huduti ka pasur vërejte në dëshminë tij.
Kurse, gjatë kësaj seance pasi që aktakuza është konsideruar e lexuar, dhe pasi që e akuzuara Berisha-Huduti përsëri është deklaruar e pafajshme është dhënë edhe fjala hyrëse.
Në fjalën hyrëse prokurori special Afrim Shefkiu ka thënë se kjo aktakuzë është e mbështetur në fakte vendimtare dhe në provat materiale të propozuara si në aktakuzë, dhe po ashtu konsiderojmë se gjendja faktike e përshkruar në aktakuzë do të vërtetohet nga provat materiale, si dhe do të vërtetohet se e akuzuara Berisha-Huduti e ka kryer veprën për të cilën po ngarkohet.
Ndërsa, mbrojtësja e të akuzuarës Berisha-Huduti, avokatja Kosovare Kelmendi në fjalën hyrëse ka thënë se e akuzuara në rrjetin social ka shprehur një mendim dhe një përshkrim apo interpretim të një ajeti kuranor apo një thënie nga një libër i shenjët, ku sipas saj duke përshkuar një situate apo ndodhi nuk mund të konsiderohet nxitje apo hakmarrje në kuptim të shtytjes apo nxitjes së akteve terroriste.
Kelmendi ka kërkuar nga gjykata që e akuzuara Berisha-Huduti të lirohet nga akuza.
Kurse e akuzuara Berisha-Huduti e ka përkrahur fjalën hyrëse të avokates Kelmendi, si dhe ka kërkuar nga trupi gjykues të gjykohet drejtësisht, pa mëshirë dhe pa justifikim.
Me kërkesë të avokates Kelmendi është ndërprerë seanca e së martës, ndërsa e radhës pritet të mbahet me 6 tetor 2021.
Ky rast fillimisht i ishte ndarë në punë gjykatëses Albina Ramaj–Shabani, mirëpo pas rritjes së numrit të gjykatësve në këtë departament, ky rast i është caktuar gjykatësit Vesel Ismajli.
Sipas aktakuzës së përpiluar me 30 shtator 2020, Ikballe Berisha-Huduti akuzohet se me 4 janar 2020, përmes rrjetit social “Facebook” kishte postuar thirrje me përmbajtje kërcënuese, duke bërë nxitje për hakmarrje pas vrasjes nga ushtria Amerikane e Qassem Solejmani-gjeneral dhe udhëheqës i gardës revolucionare të Iranit dhe gjeneral Ebu Mehdi Muhendisi.
Në aktakuzë thuhet se e akuzuara kishte postuar tekstin “Populli Irakian doli në rrugët e Irakut menjëherë pas krimit amerikan, për të dënuar ashpër padrejtësinë që iu bë dy figurave eminente në Irak e Iran dy gjeneralët të tyre Gjeneral Sylejmani dhe Gjeneral Ebu Mehdi Muhendisi. Zoti i dasht durimin ngase të mbysësh Zotin e shtëpisë i ke mbytë tërë anëtarët e shtëpisë, e pastaj hakmarrja është obligim, por nuk ka kufi”.
Për këtë postim, PSRK po pretendon se e njëjta kishte shkaktuar rrezikun që një ose më shumë vepra të tilla të kryhen.
Më këtë veprim, PSRK-ja po e akuzon atë për kryerjen e veprës penale “Shtytja për kryerjen e veprave terroriste”, nga neni 134 i Kodit Penal të Republikës së Kosovës.
