Analisti Jusuf Thaçi ka deklaruar se situata në veri, është një leksion i mirë për Qeverinë Kurti dhe Lëvizjen Vetëvendosje.
Thaçi në T7 ka thënë se më situatën atje, Qeveria e ka kuptuar se veriu s’është çështje policore.
“Po besoj që ky është një leksion i mirë për Qeverinë, sepse realisht vetëm Qeveria e Vetëvendosjes nuk është ballafaquar realisht me problemin e veriut asnjëherë, për shkak se ka qenë në opozitë, dnmth më herët. Po shpresoj që është leksion në kuptimin që tashmë është e qartë që veriu nuk është çështje policore sepse na e dimë që Policia e Kosovës ka mjaftueshëm kapacitete profesionale e infrastukturore për me i ndalë barrikadat atje ose me i largu barrikadat atje, mirëpo kjo nuk ndodhi sepse çështja e veriut është më shumë sesa çështje e forcave të brendshme. Për fatin tonë të keq, ky është realiteti”, ka thënë Thaçi.
Kujtojmë që rrugët kryesore që çojnë drejt Jarinjës dhe Bërnjakut – pikat kufitare që lidhin Kosovën me Serbinë – ishin bllokuar që nga 10 dhjetori.
Barrikadat në veri të Kosovës u ngritën nga disa grupe serbësh, për të kundërshtuar arrestimin e një ish-polici serb të Policisë së Kosovës.
Dejan Pantic u arrestua nën dyshimet për sulm ndaj zyrtarëve kosovarë, në fillim të dhjetorit.
Më 28 dhjetor, Panticit iu zëvendësuar masa e paraburgimit me arrest shtëpiak.
Për barrikadat, Kosova ka fajësuar “bandat kriminale” që kanë mbështetjen e Serbisë.
