Në stadium me bari sintetik në Gjilan, të mërkurën, u zhvillua derbi i xhiros së 21-të në Superligën e Kosovës mes Dritës dhe Ballkanit.
‘Intelektualët’ triumfuan me rezultat 1:0, falë golit të mbrojtësit, Juan Mesa.
Por, në këtë ndeshje ndodhi një rast i pazakontë.
Presidenti i Ballkanit, Arsim Kabashi, hyri në dhomën e gjyqtarëve dhe “u sqarua diçka me ata”.
Të paktën kështu tha Kabashi në një prononcim të shkurtë për TV Dukagjinin.
“Kurgjo s’ka ndodh, as s’jena rrok, as sen hiq. Kemi fol me referat, jena sqaru diçka, kurgjo tjetër s’ka pas,” tha ai.
Presidenti i Ballkanit nuk tregoi se për çfarë sqarimi bëhej fjalë.
Në anën tjetër, gjatë ditës është raportuar nga mediumi lokal ‘Radio STAR Gjilan’ se Kabashi ka ushtruar presion ndaj tyre dhe është dashur intervenimi i Policisë së Kosovës për ta larguar.
Ky medium kishte publikuar edhe një video në rrjetin social Facebook.
