Zgjedhjet e 14 majit, pa dyshim mund të cilësohen si më të vështirat për presidentin turk Recep Tayyip Erdogan.
Udhëheqësi turk po kërkon një tjetër mandat në zgjedhjet presidenciale dhe parlamentare, një nder sfidat më të rëndësishme që po përballet Erdogan pas 20 vitesh në pushtet.
Kreu i Turqisë po duket pak më i dobët këtë fundjavë pasi u sëmur papritmas në televizionin drejtpërdrejt. Autoritetet njoftuan se Erdogan nuk ka asgjë më serioze se gripi i stomakut. Ai iu bashkua sërish tubimeve të shtunën.
Në një intervistë për mediat vendase ai tha se ndihet mire dhe se do të vazhdoje betejën për të fituar zgjedhjet.
“Jam mirë. Pas asaj dite unë zhvillova tubime të rëndësishme në sheshe. Më i rëndësishmi prej tyre ishte programi që u zhvillua në Ankara. Unë veçanërisht kërkoj nga qytetarët e mi që ta përdorin pushtetin e tyre në mënyrën më të mirë të mundshme.”
Fakti që presidenti turk, në mënyrë të pazakontë, në sondazhet e zhvilluara shfaqet më pak i preferuar se rivali i tij, Kemal Kılıçdaroğlu, kreu i Partisë Republikane Popullore dhe lider i një aleance gjashtë partish opozitare, është një shenjë se terreni politik mund të jetë duke u zhvendosur.
Mirëpo kreu i shtetit turk thotë se ai vlerëson mbështetjen e qytetarëve nga mbështetja që ka marrë nga tubimet.
“Nëse flasim në gjuhën e shesheve, është një pamje shumë ndryshe nga ajo që shohim ne sondazhet që kemi marrë. Pra, nëse flasim për mbështetjen në shesh, ne po shkojmë drejt fitores si komb. Fushata është nga ne, fitorja është nga Allahu”.
Analistët pretendojnë se partia e Erdoganit për Drejtësi dhe Zhvillim dhe aleatët e saj ultra-nacionalistë mund të humbasin po ashtu kontrollin e parlamentit, pas humbjeve të mëparshme të rëndësishme në zgjedhjet lokale në Stamboll dhe Ankara.
Erdogan do të përballet me sfidën më të ashpër nga gjashtë parti opozitare që i kanë bashkuar forcat, pastaj me zemërimin e publikut për koston e lartë të jetesës dhe pasojat katastrofike që kanë shkaktuar dy tërmete në muajin shkurt./PrishtinaPress/
