Një sulm ajror izraelit në një shtëpi në Jabalia të dielën vrau Mohammad Morsi, zëvendësdrejtor i Shërbimit të Emergjencës Civile të Gazës në zonat veriore të Rripit të Gazës, dhe katër anëtarë të familjes së tij, thanë zyrtarët shëndetësorë.
`Shërbimi i Emergjencës Civile tha në një deklaratë se vdekja e Morsit e rriti në 83 numrin e anëtarëve të tij të vrarë nga zjarri izraelit që nga 7 tetori. Nuk pati asnjë koment të menjëhershëm nga Izraeli mbi vdekjen e Morsit.
Banorët thanë se forcat izraelite kishin shpërthyer gjithashtu disa shtëpi në periferi të Zeitoun, në qytetin e Gazës, 5 km nga Jabalia.
Ekipet mjekësore thanë se nuk ishin në gjendje t’u përgjigjeshin thirrjeve të dëshpëruara të disa banorëve që raportonin se ishin të bllokuar brenda shtëpive të tyre, disa prej të cilëve të plagosur.
“Ne dëgjojmë bombardime të vazhdueshme në Zeitoun, e dimë që po shpërthejnë shtëpi atje, nuk flemë për shkak të zhurmave të shpërthimeve, zhurma e tankeve duket afër dhe dronët nuk ndalojnë së fluturuari,” tha një banor i qytetit të Gazës, që jeton rreth 1 km larg, ka raportuar Reuters.
