Lidhur me çështjen e taksës ka reaguar edhe ish-ministri i Tregtisë dhe Industrisë, Bajrami Hasani.
Hasani duke komentuar qëndrimin e kryeministrit të Kosovës, Albin Kurti se taksa 100% ndaj produkteve serbe duhet zëvendësuar me reciprocitet ekonomik, politik dhe tregtar tha se ende nuk ka ardhur koha për heqjen e kësaj takse.
Sipas tij nëse ndonjëherë pas luftës Kosova ka treguar fuqi ndaj Serbisë, ka qenë me vendosjen e taksës.
Ai madje tha se për LDK-në e ka ditur që e largon këtë taksë lehtësisht, por që kryeministri Kurti nuk duhet ngutur sepse tha se shumë vite ka luftuar kundër mallrave me barkodin 860.
Postimi i plotë:
Nëse ndonjëherë pas luftës Kosova ka treguar fuqi ndaj Serbisë, ka qenë me vendosjen e masave mbrojtëse dhe taksa 100 % ndaj produkteve serbe.
Nuk besoj që ka ndonjë qytetarë të këtij vendi që nuk është ndier mirë me fuqinë e treguar dhe ndikimin që ka pasur taksa.
Masat mbrojtëse, taksa 100 % dhe po ashtu vendosja e flamurit të origjinës në raftet ku ekspozohen mallrat kanë pasur ndikim të madh si financiar, por edhe e kanë edukuar qytetarin e Kosovës për të blerë prodhime vendi.
Ende nuk ka ardhur koha për heqjen e kësaj takse. Serbisë duhet t’i shkaktohen edhe më shumë dëme ekonomike. Për LDK-në e kam ditur që e largon taksën lehtësisht, ama ti kryeministër Kurti mos u ngut sepse edhe vet shumë vite ke luftuar kundër mallrave me barkodin 860.
Me taksë deri në njohje!