Ish-kreu i Partisë së Fortë e sfidon Shpend Ahmetin me 6 pyetje për parkingun nëntokësor
Prishtinapress
Ish-kryetari i Partisë së Fortë, Visar Arifaj, ka disa pyetje për kreun e Prishtinës, Shpend Ahmeti, për parkingun nëntokësor që po ndërtohet në kryeqytet.
Arifaj ka shkruar në Twitter ku ka kërkuar detaje shtesë rreth parkingut nëntokësor.
“Cila ka me qenë zgjidhja për zhavor-parkingjet n’çdo cep të Prishtinës që e bojnë me u dokë si pazar t’kerreve? Me fjalë tjera, çka me bo me Bleri Parkingun e ekuivalentët?”, ka shkruar Arifaj.
Arifaj ka pyetur Ahmetin edhe për orientimin e trafikut dhe mbylljen e bulevardit George Bush.
“U përmend që “do të mundoheni” me i rujtë drunjtë ekzistues. A mundeni me na e sqaru pak ma gjansisht qet “mundim”? U përmend që disa ma t’vjetër do t’zhvendosën në afërsi, e tjerat? Cilat janë masat që janë marrë e po mirren që mos me përfundu me “u mundum, po qikaq mujtem”?”, shkruan Arifaj.
Arifaj ka kërkuar detaje shtesë edhe rreth ndarjes së punëve për periudhën 18 mujore të cilën përmendi Ahmeti sot në konferencën për prezantimin e projektit të parkingut.
“N’çfarë faza osht e ndame puna në këtë pjesë? Pra, qata 18 muaj punë a e përfshijnë edhe pjesën e re t’sheshit prej Katedrales deri te Zahiri apo vetëm parkingun?”, ka shkruar ai.
Kryetari i Prishtinës, Shpend Ahmeti, sot ka prezantuar projektin e parkingut nëntokësor, ku ka bërë të ditur se ky projekt do të përfundojë për 18 muaj.
Parkingu nëntokësor do të ketë 23 mijë metra katrorë hapësirë parkingu, 2 kate nga 11 mijë e 500, përafërsisht 700 vende të parkingut.
13 mijë metra katrorë do të jetë hapësirë e gjelbëruar.
Do të ketë galeri të hapur, amfiteatër, kthina të vogla për shërbime komunale, 500 metra katrorë hapësirë komerciale që do të vendoset në katin zero.
Në total do të jenë 700 vendparkime, 600 standarde, 41 parkingje dhe mundësi për karikim të veturave elektronike, 26 për motoçikleta, 33 për persona me nevoja të veçanta. Hapësira do të jetë me ujitje automatike.
Brenda objektit do të ketë edhe ashensorë.
Ndryshe, Komuna e Prishtinës përgjatë vitit 2018 kishte filluar fazën e parë për ndërtimin e parkingut e që është shpallja e kërkesës për kualifikim, për të vazhduar më pas me shpalljen e kërkesës për propozim dhe për të përfunduar me përzgjedhjen e ofertuesit më të suksesshëm,
Në fazën e parë, atë të aplikimit të ofertuesve kishin aplikuar gjashtë kompani.
Kërkesa për kualifikim ka për qëllim që t’i përzgjedhë kompanitë që kanë potencial financiar dhe operativ për të realizuar projektin, dhe bazohet në kualifikimet minimale teknike si dhe kualifikimet minimale financiare.
Por rreth çështjes së ndërtimit të këtij parkingu, kryetari i Komunës së Prishtinës, Shpend Ahmeti, ishte zotuar se punimet do të fillojnë në vitin 2018.
Sipërfaqja e ndarë për parking është 13,990 metra katrorë dhe është planifikuar që të ndërtohet në 2 etazhe. Disniveli në pjesën perëndimore të lokacionit mund të shfrytëzohet për ndërtimin e disa lokaleve afariste, në sipërfaqe të përgjithshme prej 500 metrash katrorë.
Një prej pjesëve të rëndësishme të këtij projekti, është parku mbi parking, i cili do të jetë edhe parku qendror i kryeqytetit.
