Ish-drejtori i CIA-s dhe gjenerali amerikan David Petraeus theksoi se vrasja e komandantit të Forcës Quds Qasem Soleimani është më e rëndësishme se vrasjet e Osama bin Ladenit ose udhëheqësit të ISIS-it Abu Bakr al-Bagdadi, sipas Foreign Policy.
Ish-drejtori i CIA theksoi se Soleimani ishte “arkitekti dhe komandanti operacional” i përpjekjeve të Iranit për të vendosur kontrollin mbi rajonin. Komandanti i Forcës Quds siguroi armë dhe municione që vranë mbi 600 ushtarë amerikanë dhe shumë partnerë të tjerë të koalicionit në Irak, Siri dhe vende të tjera.
Petraeus i tha Foreign Policy se duket se sulmi ajror u krye për të treguar se SHBA “thjesht nuk do të lejojë dhunën e vazhdueshme”, përfshirë sulmet me raketa në bazat amerikane, transmeton Telegrafi.
“Natyrisht, të gjitha palët do të vuajnë nëse kjo bëhet një luftë më e gjerë, por Irani duhet të shqetësohet shumë se … ky është një kërcënim i vërtetë për regjimin në një mënyrë që ne nuk e kemi parë para kësaj”, tha Petraeus.
Soleimani dhe komandanti i milicisë irakene Abu Mahdi al-Muhandis, së bashku me të paktën 10 persona të tjerë, u vranë në një sulm ajror amerikan në Bagdad më 3 janar.