Kreu i Komunës së Prishtinës, Shpend Ahmeti, sot gjatë ditës paralajmëroi kallëzim penal ndaj njërit prej ish drejtorëve të arsimit në komunën që tani ai e udhëheq. Ahmeti e ka akuzuar njërin nga ish drejtorët për punësimin e mbi 100 personave pa konkurs në fushën e arsimit në Komunën e Prishtinës
Por, njëri nga drejtorët e mëparshëm në këtë komunë, Halim Halimi, nga radhët e LDK’së, i cili mban pozitën e kryesuesit të asamblesë në këtë komunë, i kontaktuar nga Gazeta Express, i është përgjigjur Ahmetit për akuzat që i ka bërë atij.
Ai ka thënë se Shpend Ahmeti duhet të japë përgjegjësi për punësimet e 276 militantëve që ai i ka bërë në Komunën e Prishtinës, të gjetura këto të cilat sipas Halimit janë bërë nga zyra e Auditorit të Përgjithshëm.
Sipas ish drejtorit të arsimit në këtë komunë, të gjithë të punësuarit në kohën sa ai ka qenë drejtor janë bërë në bazë të konkursit.
“…Kallëzime penale të komunës së Prishtinës dhe të Shpendit janë bërë modë, veç po ia fut së koti qashtu. Unë të gjithë njerëzit i kam punësuar në bazë të konkursit, nuk i kam lënë që të humbin nxënësit”, ka thënë Halimi.
Ai gjendjen në arsim në komunën e Prishtinës e ka vlerësuar alarmante. Sipas tij nxënësit nëpër shkollat e Prishtinës me nga 3 deri në 4 muaj qëndrojnë pa mësues, kjo sipas tij si pasojë e neglizhencës në këtë komunë.
Madje ai thotë se Shpend Ahmeti po bën punësime përmes telefonit, duke i urdhëruar shkollat që t’i pranojnë mësuesit e dërguar nga vetë ai.
“Shpend Ahmeti bën punësime vetëm në bazë të telefonit, e urdhëron shkollën, i thotë këtë mësues po ta dërgoj. Ka plot shkelje që po bëhen në Prishtinë. Për këto punë që po merret Shpendi është kompetente Prokuroria që të merret. Iu kanë ndërru në komunë 7 drejtorë që nuk kanë mundur që t’i përballojnë presionet e tij”, ka shtuar ish drejtori i arsimit nga radhët e LDK’së në Prishtinë, Halim Halimi.
