Në Lidhjen Demokratike të Kosovës (LDK), ka filluar procesi zgjedhor partiak.
Kryetari aktual i LDK-së, Isa Mustafa, përmes një postimi në profilin e tij zyrtar në rrjetin social Facebook, ka lënë të nënkuptohet se ai edhe mund të jetë kandidat për kryetar të kësaj partie.
“Tani LDK-ja nuk ka kandidatë për kryetarë e as kryetarë në largim. Zgjedhjet i fillon dhe i kryen LDK-ja duke e respektuar vullnetin e shumicës”, ka shkruar ndër të tjera Mustafa.
Postimi i plotë i Mustafës pa ndërhyrje:
Zgjedhjet e brendshme në LDK synojnë forcimin e mëtejmë të kësaj Lidhjeje, që gëzon besimin më të madh në Kosovë.
Po informohem çdo ditë se kemi një proces të suksesshmë dhe demokratik dhe një interesim të gjerë për anëtarësime të reja në LDK.
Fokusimi ynë është në zgjerimin e LDK-së, në zgjedhje të sukseshme në nëndegë dhe në degë. Kandidimet për kryetarë të degëve dhe për Kryetar të LDK-së, sipas Statutit, do të bëhen në Kuvendet e degëve, përkatësisht atë qendror të LDK-së.
Tani LDK-ja nuk ka kandidatë për kryetarë e as kryetarë në largim.
Zgjedhjet i fillon dhe i kryen LDK-ja duke e respektuar vullnetin e shumicës.
Ky vullnet do të dihet pasi të përmbyllet procesi në degë. Prandaj kandidatët i shpall LDK-ja duke respektuar vullnetin e çdonjërit.
Do tu isha mirënjohës gjithë atyre që e respektojnë këtë proces.