Andres Iniesta nuk do të bëhet prapë bashkëlojtar i Lionel Messit.
Pas largimit nga Japonia, të gjithë mendonin se legjenda spanjolle do të transferohej në Inter Miami, aty ku është formuar një ekip që po quhet “Barcelona II”.
Leo Messi, Sergio Busquets e Jordi Alba iu bashkuan së fundmi ekipit nga liga MLS, ndërsa pritej që rrugën e tyre ta ndiqnin Iniesta dhe Luis Suarez.
Por, veterani i mesfushës duket se do ta vazhdojë karrierën në Emiratet e Bashkuara Arabe, njofton eksperti i transfereve, Fabrizio Romano.
Ish-përfaqësuesi spanjoll pritet të arrijë sot në Dubai dhe ta nënshkruajë kontratrën me ekipin Emirates Club FC nga Ras Al-Khaimah.
Ish-futbollisti i Barcelonës pritet të nënshkruajë deri në qershor 2024, me mundësi vazhdimi për një vit tjetër, deri në verën e vitit 2025.
Kështu, do të marrë fund ëndrra e tifozëve për t’i parë prapë bashkë Iniestan me Messin, pas magjisë që e kanë dhuruar në futbollin evropian në kohët e tyre të arta.