Një incident i rrallë dhe i rëndë ndodhi të mërkurën në shkollën e fshatit Shirok në Suharekë, ku një polic vrau qenin që u fut brenda objektit dhe sulmoi katër nxënës. Pronari i qenit u arrestua dhe përfundoi në mbajtje, ndërsa Policia ka ndërmarrë veprimet e nevojshme, raporton Gazeta Sinjali.
I dyshuari Hasan Gjesha u arrestua nën dyshimet se ka lënë pa përkujdesje qenin, duke shkaktuar kështu rrezik të përgjithshëm.
Sinjali mëson se ndaj tij, Prokuroria Themelore në Prizren ka kërkuar masën e paraburgimit dhe seanca dëgjimore është mbajtur sot.
Dy nga katër nxënësit që u lënduan kanë marrë plagë më serioze dhe po trajtohen në Spitalin Rajonal të Prizrenit, ndërsa dy të tjerët janë liruar.
