Të gjitha strukturat e LDK-së i kanë dhënë mbështetje të fuqishme kryetarit Haziri, duke vlerësuar lartë qeverisjen komunale në udhëheqjen e tij, i cili e ktheu kujdesin e Qeverisë së Republikës në investime, përderisa interesim të madh për Gjilanin ka shfaqur Tirana, Brukseli dhe shtetet tjera mike, duke ia ndryshuar jetën qytetarëve të Gjilanit, thuhet në komunikatën e LDK-së lëshuar nga Zyra për Marrëdhënie me Publikun, transmeton lajmi.net.
Më tej thuhet se në këto takime, është parë një mobilizim masiv i strukturave të LDK-së, sidomos pas zgjedhjeve të Forumit të Gruas dhe Forumit të Rinisë, ndërkaq janë aktivizuar të gjitha Komisionet e Degës, të cilat kanë paraqitur raportet një-veçare të punës, është miratuar buxheti 2017 dhe po ashtu LDK ka ndarë obligimet organizative për t’u rikthyer në bashkëbisedim me qytetarët.
Strukturat LDK-së në Gjilan janë mobilizuar i fuqishëm për fitoren e radhës, e cila do të jetë sërish plebishitare, edhe atë pa balotazh. Të pranishmit kanë vlerësuar se LDK është shpresë dhe besë për qytetarët e Gjilanit, thuhet tutje në komunikatë.
Po ashtu, Lidhja Demokratike është duke punuar për organizimin e Konventës ditore më 16 prill, kur edhe do të shënohet 27-vjetori i themelimit të partisë së Ibrahim Rugovës në Gjilan.
Ndërkohë, pas një debati të gjatë në kryesi, me propozim të kryetarit Lutfi Haziri, Imet Rrahmani është zgjedhur nënkryetar i Degës, ndërsa Arben Mehmeti sekretar.
Duket se shtyrja e Rrahmanit në krye të degës në Gjilan ka të bëjë me kandidaturën e tij për kryetar të Gjilanit, meqë Lutfi Haziri ka konfirmuar se nuk do të rikandidoj.
