I dërguari i Posaçëm i Bashkimit Evropian për bisedimet Kosovë – Serbi, Miroslav Lajçak, tha të hënën se ka rënë dakord me kryenegociatorin e Kosovës, Besnik Bislimi, për hapat e parë drejt shtensionimit të situatës në veri, por pa dhënë më shumë hollësi rreth tyre.
Takimi mes tyre është mbajtur në Bratisllavë, por deputeti Deputeti i Lidhjes Demokratike të Kosovës, Avdullah Hoti, ka kritikuar Qeverinë se “askush nuk di gjë se çfarë janë marrë vesh”.
Këtë koment, Hoti e ka bërë në profilin e tij në Facebook, duke kritikuar qeverinë edhe për raportet me SHBA-në e BE-në.
“Uashingtonin e Brukselin i kanë zëvendësuar me Ohrin e Bratisllavën. Kjo është politikë se jo mahi”, shkruan ai ndër të tjera.
Postimi i tij i plotë:
Duke mos përfillur këshillat e aleatëve, bien në kurthin e Vuçiqit që për qëllim ka tensionimin e situatës në veri.
Kryetarët e zgjedhur me 2% i fusin në zyrë me polici dhe i mbajnë të ngujuar.
Nuk i përfillin kërkesat e aleatëve kur u vijnë për vizitë në Prishtinë dhe u kërkojnë zgjedhje të reja në ato komuna pa kushte nga asnjëra palë.
Shkojnë në Bratisllavë e merren vesh për shtensionim të situatës, por askush nuk di gjë se çfarë janë marrë vesh.
Uashingtonin e Brukselin i kanë zëvendësuar me Ohrin e Bratisllavën.
Kjo është politikë se jo mahi
