Kryeministri i vendit, Avdullah Hoti sot pas takimit me presidentin e vendit, Hashim Thaçi në një konferencë për media tha se pas 30 vjetëve janë në pikën kur duhet të përmbyllet përfundimisht dhe të konsolidohet shtetësia e Kosovës në arenën ndërkombëtare dhe është me rëndësi të jenë së bashku në këtë proces.
Hoti pas takimit me Thaçin tha se ngadalë po formësohet dhe po unifikohet qëndrimi i gjitha institucioneve të Kosovës karshi dialogut me Serbinë. Hoti dhe Thaçi konferencat për media i mbajtën ndaras.
“Sot e prezantova kornizën dialoguese edhe para presidentit dhe të koordinohemi në këtë proces të rëndësishëm që nuk është veç i kësaj qeverie, por i të gjitha partive politike dhe qytetarëve të Kosovës”, tha Hoti, raporton Telegrafi.
I pyetur se kush do të udhëheqë me dialogun, Hoti tha “ato çështje as nuk shtrohen.. Kushtetuta është e qartë në këtë drejtim, kompetencat edhe të presidentit dhe të mia edhe të institucioneve tjera janë më se të qarta dhe aktvendimi i Kushtetueses i vitit të kaluar është mjaft i qartë. I kemi rolet e ndara po është me rëndësi që në këtë proces të jemi të koordinuar…”.
Kreu i ekzekutivit tha se ka pasur takime edhe me partnerët qeverisës, ndërsa ftoi opozitën për takim në mënyrë që të njoftohen për platformën e qeverisë rreth dialogut.
“Siç e kam thënë do të mundohem të krijojë një konsensus të gjerë në mes forcave politike dhe me udhëheqësit e tjerë të institucioneve të Kosovës për një proces që është tepër i rëndësishëm…Pas 30 vjetëve jemi në pikën kur duhet të përmbyllet përfundimisht dhe konsolidohet shtetësia e Kosovës në arenën ndërkombëtare dhe është tepër me rëndësi të jemi së bashku në këtë proces”, tha ai.
Hoti foli edhe për vizitën e Miroslav Lajçak në Kosovë. Sipas tij, përfaqësuesit të BE-së për dialogun do t’i prezantohet qëndrimi i Qeverisë karshi dialogut.
“…Kemi qenë në komunikim gjatë gjithë javës së kaluar edhe me ambasadorët e QUIN-it dhe BE-së. Ngadalë po formësohet dhe po unifikohet qëndrimi i gjitha institucioneve të Kosovës karshi dialogut…”, tha ai.
Kreu i ekzekutivit të vendit ka folur edhe rreth udhëheqjes së dialogut. “Ne jemi të gatshëm dhe e kemi artikuluar qartë qëndrimin tonë si qeveri. E kam komuniku tani edhe me presidentin. Të mërkurën kam takim edhe me shoqërinë civile dhe ngadalë po e formësojmë komplet konjukturën sa i përket dialogut. Do të kem komunikim edhe Kuvendin e Kosovës në këtë drejtim. Sa na përket neve ne jemi të gatshëm”, tha ai.