Kryeministri Isa Mustafa ditë më parë kishte thënë se me deputetët e LDK’së, kundërshtarë të Demarkacionit, do të merret partia në të ardhmen, duke lënë të nënkuptohet se ata edhe mund të ndëshkohen.
Por zëdhënësi i Isa Mustafës, nënkryetari i LDK’së Lutfi Haziri, thotë se Kryeministri u keqkuptua, pasi sipas tij, LDK nuk është parti ndëshkuese.
“Kryeministri edhe kryetari i LDK’së nuk njihet asnjëherë për metoda ndëshkuese, as për diçka që i penalizon. Kryeministri mendoj se është keqkuptu publikisht, nuk ka të bëjë me penalizim politik, ka të bëjë me unifikim, po vazhdon me kërku unifikim politik, po vazhdon mos me leju me u nda asnjë votë e LDK’së por me u bashku edhe votat tjera”, tha Haziri për RTK’në.
Thotë se penalizimi më i madh atyre që po i kundërshtojnë politikat e partisë do tu vije nga elektorati i kësaj partie.
“Secili prej tyre ka me u penalizu nga vota e qytetarëve”, tha ai.
Pos deputetit Shpejtim Bulliqit, edhe pse jo zyrtarisht, ka pasur edhe deputetë të tjerë të cilët kanë kundërshtuar ta votojnë versionin aktual të Demarkacionit. Të përfolurit e tjerë në media janë Vjosa Osmani, Adem Salihaj, Fatmir Rexhepi, Hatim Baxhaku, Armend Zemaj dhe Arben Gashi.
