Zëvendëspresidentja amerikane Kamala Harris, u zotua të “mos hesht” për vuajtjet në Gaza në mes të luftës Izrael-Hamas.
Ajo tha se shprehu “shqetësimin e saj serioz” kryeministrit izraelit Benjamin Netanyahu të enjten, ndërsa i tha atij se është koha për të mbyllur një marrëveshje armëpushimi.
“Izraeli ka të drejtë të mbrojë veten dhe mënyra se si e bën këtë ka rëndësi. Ajo që ka ndodhur në Gaza gjatë nëntë muajve të fundit është shkatërruese”, u tha gazetarëve Harrisi, kandidatja e supozuar presidenciale demokrate.
Ajo këtë e bëri gjatë komenteve pas takimit të saj me Netanyahun në Washington, raporton CNN.
“Imazhet e fëmijëve të vdekur dhe të njerëzve të uritur të dëshpëruar që ikin për siguri, ndonjëherë të zhvendosur për herë të dytë, të tretë apo të katërt. Ne nuk mund të shikojmë larg përballë këtyre tragjedive. Nuk mund ta lejojmë veten të mpihemi nga vuajtjet dhe unë nuk do të hesht”, u shpreh tutje 59-vjeçarja.
Komentet e Harrisit dhanë shpjegimin më të qartë ende të pikëpamjeve të saj mbi konfliktin, ndërsa ajo punon për të balancuar çështjen që jo vetëm që ka ndarë vendin, por ka shkaktuar fërkime brenda Partisë Demokratike.
Ajo u bëri jehonë komenteve të përsëritura të presidentit të ShBA-së Joe Biden për “mbështetjen e hekurt” të Amerikës dhe “angazhimin e palëkundur” ndaj Izraelit, por Harrisi shprehi dëshirën për t’i dhënë fund luftës.
Duke kujtuar detajet e armëpushimit të propozuar të mbështetur nga ShBA-ja dhe marrëveshjes së pengjeve, Harrisi tha se “është koha që kjo luftë të përfundojë dhe të përfundojë në një mënyrë ku Izraeli të jetë i sigurt, të gjithë pengjet të lirohen, vuajtjet e palestinezëve në Gaza të marrin fund, dhe populli palestinez mund të ushtrojë të drejtën e tij për liri, dinjitet dhe vetëvendosje”.
“Siç sapo i thashë kryeministrit Netanyahu, është koha për ta realizuar këtë marrëveshje. Kështu që kujtdo që ka bërë thirrje për armëpushim dhe kujtdo që dëshiron paqen, ju shoh dhe ju dëgjoj”, tha ajo.
59-vjeçarja tha se Administrata Biden, po punon për të sjellë pengjet amerikanë në Gaza.
Nënkryetarja, e cila është takuar me familjet e pengjeve, renditi emrat e atyre që mbahen nga Hamasi.
Në një moment të dukshëm pranë përfundimit të fjalëve të saj, Harrisi u tha gazetarëve se “është e rëndësishme që populli amerikan të kujtojë, lufta në Gaza nuk është një çështje binare”.
“Le të dënojmë të gjithë terrorizmin dhe dhunën. Le të bëjmë të gjithë çfarë mundemi për të parandaluar vuajtjet e civilëve të pafajshëm. Dhe le të dënojmë antisemitizmin, islamofobinë dhe urrejtjen e çdo lloji. Dhe le të punojmë për të bashkuar vendin tonë”, tha ajo.
