Daut Haradinaj nga AAK foli për fitorën e dytë të republikanit Donald Trump në krye të Shteteve të Bashkuara të Amerikës, fitore kjo të cilën e vlerësoi pozitive edhe për shtetin e Kosovës, raporton GazetaDemos.
Haradinaj rikujtoi se dy nga sukseset e jashtëzakonshme të Kosovës, si themelimi i ushtrisë si dhe njohja nga Izraeli, ndodhën pikërisht nën udhëheqjen e republikanëve, në krye me Trumpin
“Është kanë dëshira ime me fitu Trumpi për shumë arsye, sepse dy-tre sukseset e jashtëzakonshme që i kemi mbërri në Qeverinë e Haradinaj 2 kanë qenë në kohën kur e ka udhëheq shtetin më të fuqishëm presidenti Trump. Pra, kur e kemi fitu ushtrinë, ka qenë pikërisht koha e administrimit të tij dhe unë përjetësisht shprehu mirënjohje edhe për sekretarin e Mbrojtjes në atë kohë, por në të njëjtën kohë e kemi marr edhe njohjen e Izraelit, që ka qenë një prej fuqive më të mëdha për ne”, tha Haradinaj për GazetënDemos.
Haradinaj shprehu besueshmërin e tij ndaj krerëve të SHBA-ve sa i përket raporteve me Kosovës, duke shpresuar edhe anëtarësimin e vendit në NATO, pikërisht gjatë mandatit të presidentit Trump.
“Besoj që Administrata amerikane është tepër e madhe dhe është në vizionin e vet për përkrahjen e Kosovës, qysh e kanë pas brezat e mëhershëm që nga Xhorxh Bush kur e kemi marr edhe deklarimin publik “Enough is enough, Kosova është shtet”. Unë besoj shumë se edhe me presidentin e ri, në mandatin e dytë, do ta vazhdojmë rrugën e njëjtë në qëllimin e përbashkët që Kosova të jetë pjesë e NATO-s. Anëtarësimi në NATO po mendoj që është ‘game over’ në kuptimin e sigurisë për Republikën e Kosovës. Do të punojmë pandal që ta arrijmë këtë qëllim pikërisht në kohën sa është presidenti Trump”, shtoi Haradinaj.
