Policia e Kosovës ka hapur rast për veprat penale ‘sulm dhe kanosje’ ndaj personit që e goditi një banore në ‘It’s my Home’.
Lajmi e ka konfirmuar zëdhënësja e Policisë së Kosovës në rajonin e Prishtinës, Flora Ahmetit.
“Lidhur me ngjarjen në fjalë, pas përfundimit të fazës fillestare të hetimit si dhe intervistimit të disa personave policia është udhëzuar nga prokurori i shtetit që të hap rast për veprat sulm dhe kanosje”, tha Ahmeti.
Të njëjtit thanë se janë në koordinim me prokurorinë duke marrë veprimet e nevojshme policore lidhur me rastin.
Kujtojmë se sot gjatë ditës, pas një debati të ashpër në këtë reality show, një banore është goditur me këpucë nga një tjetër banor.
Viktima e dhunës, në këtë rast banorja e “It’s my home”, në pamjet e publikuara shihet teksa largohet duke qarë nga pjesa ku po debatonte dhe askush nuk shkon pas saj për ta ndihmuar. Përkundrazi një grua aty e përkrahi dhunën ndaj saj duke i thënë sulmuesit “bravo, mirë ia bëre”.
E përlotur, banorja që u sulmua dëgjohej teksa thotë “S’jam ardhë unë mem rreh këtu”.
Kjo skenë e dhunës fizike, por edhe skena të tjera brenda kësaj shtëpie kanë bërë që të kërkohet ndërhyrja e Policisë së Kosovës.