Deputeti i Lëvizjes Vetëvendosje, Haki Abazi, i cili së fundmi ka shfaqur shumë pakënaqësi me kryeministrin Albin Kurti dhe Lëvizjen Vetëvendosje, ka folur edhe për raportet me të.
Abazi ka folur edhe për pakënaqësitë e tij dhe arsyet që kanë bërë që të mos jetë pjesë e Qeverisë Kurti 2.
Deputeti Abazi, i cili ishte zëvendëskryeministër i parë i Qeverisë Kurti I, ka thënë se me Kurtin ishin pajtuar që edhe në Qeverinë Kurti II të shkonin me ekipin e njëjtë.
Madje, duke folur për këtë cështje, Abazi ka thënë se ka kontribuuar shumë në LVV. Abazi ka thënë se ai e ka ndihmuar kryeministrin Albin Kurti edhe që t’i hiqet ndalesa e vizës amerikane, shkruan Demokracia.com.
“Kontributi im prej heqjes së ndalesës për vizë në Amerikë”, ka thënë Abazi në Pressing, por nuk e ka përfunduar fjalinë, pasi kishte ndërhyrje me një pyetje.
Megjithatë, në Qeverinë Kurti II, Abazi u la anash dhe Kurti vendosi që zëvendëskryeministër ta bëj Besnik Bislimin, porse atij ia kishte dhënë një arsyetim pse nuk do ta bënte pjesë të qeverisë së re.
“Arsyetimet kanë qenë të llojit që nuk ke marrë vota të mjaftueshme. Me ju thënë të drejtën, ju betohem, me shumë sinqeritet e kam marrë këtë arsyetim. Vetëm se i kam thënë që Besnik Bislimi nuk ka dalë fare, Artane Rizvanolli e Rozeta Hajdari s’kanë qenë kurrë pjesë e listës”, ka deklaruar Abazi.
Sipas deputetit, Kurti i kishte thënë se ai ishte ekipi me të cilin do të ecte përpara.
“Tha ky është ekipi që unë kam vendosë me ecë përpara. I thashë puna e mbarë. Unë e kam votu Qeverinë e presidenten”, ka thënë ai.
Për Abazin, e vërteta pse ai nuk është i përshtatshëm për të qenë pjesë e Qeverisë është, sepse ai nuk është “mjaftueshëm i majtë”.
“Tash vjen puna te diskutimit te Rugova. Zgjedhjet e brendshme në VV kanë dëshmuar një gjë të vetme, që unë nuk jam mjaftueshëm i majtë në perceptimit të grupit që ka fitu. Ti mundesh me dhënë gjithçka prej vetes, ku si fazë e parë llogaritet mbushja e barkut me ushqim, pra eliminimin e varfërisë për të arritur te përcaktimi ideologjik. Konstatimi duket është bërë më herët si duket, që një njeri efektiv nuk mund të jetë pjesë e qeverisë, ose i majtë, ose brenda vijave të lojalitetit të qeverisë”, ka deklaruar Abazi.