Kosova e ka raportuar Serbinë në FIFA pasi që këta të fundit shpalosen një flamur me hartën e Kosovës dhe me simbole serbe në Kupën e Botës në Katar.
Shtëpia më e madhe e futbollit ka hapur procedurë disiplinore ndaj serbëve dhe rrezikohet që të sanksionohet rëndë.
Për këtë rast, ministri i Kulturës, Rinisë dhe Sportit i Kosovës, Hajrulla Çeku ka njoftuar se ka marrë kërcënime dhe fyerje të shumta nga Serbia.
Ky është njoftimi i ministrit Çeku:
Përgjatë dy ditëve të fundit kam pranuar qindra mesazhe fyese dhe kërcënuese nga Serbia, nga momenti që e kemi sensibilizuar opinionin botëror për veprimin shovinist të ekipit të tyre të futbollit në Botërorin Katari 2022.
Fyerjet drejtuar familjes sime dhe kërcënimet me vrasje janë tregues të radhës se shovinizmi serb është rreziku më i madh ndaj paqes në rajonin tonë. Demokratizimi i Serbisë dhe shkëputja nga kontrolli rus janë parakushte për siguri e përparim në Ballkanin Perëndimor.
Një nga mënyrat më të mira për të mbrojtur të drejtën dhe të vërtetën tonë është edhe diplomacia qytetare. Reagimet publike të shumë qytetarëve tanë i kanë dhënë fuqi ankesës së Federatës së Futbollit të Kosovës drejtuar FIFA-s. Besojmë që Serbia do të marr dënimin e merituar për veprimin skandaloz të tyre që e shndërron sportin në mjet të aspiratave pushtuese.
