Komisioneri për Zgjerim i Bashkimit Evropian, Johannes Hahn, ka folur edhe një herë për marrëveshjen që duhet të arrihet mes Prishtinës dhe Beogradit për normalizimin e raporteve.
Hahn në një intervistë për “Tanjug” ka thënë se zgjidhja afatgjatë për normalizimin e raporteve mes Kosovës dhe Serbisë përfshinë një marrëveshje të qëndrueshme dhe reale e cila bazohet në ligjet ndërkombëtare, transmeton lajmi.net.
“Hapi i rradhës është normalizimi i raporteve mes Kosovës dhe Serbisë në një nivel gjithëpërfshirës për të dy palët. Me ndihmën e Federica Mogherinit do të definohet përmbajtja e një marrëveshje ligjërisht obliguese për Prishtinën dhe Beogradin”, deklaroi Hahn.
Ndërkohë, Hahn gjatë ditës së djeshme u takua edhe me zëvendëskryeministrin e Kosovës, Enver Hoxhaj, ku edhe u diskutuan raportet Kosovë-Serbi, si dhe dialogu si zgjidhje e vetme e problemit mes vendeve.
