Kombëtarja e Kosovës do ta zhvillojë sonte ndeshjen e katërt në maratonën e muajit qershor në Ligën e Kombeve.
“Dardanët” do të përballen me Greqinë për herë të gjashtë në mes tyre që prej pranimit të Kosovës në UEFA e FIFA.
Verdhekaltrit kanë statistika të dobëta me grekët pasi nuk i kanë mposhtur asnjëherë ata në pesë përballjet paraprake.
Tri ndeshje kanë përfunduar baras, kurse dy herë kanë fituar grekët.
Ata e mposhtën Vedat Muriqin me shokë edhe të dielën e kaluar në stadiumin “Fadil Vokrri”.
Ndërsa sonte, “Dardanët” janë të vendosur për ta shijuar fitoren e parë ndonjëherë ndaj grekëve.
Por, shumë shpresa Kosovës nuk i japin edhe kompanitë më të njohura të basteve në botë.
Fitorja eventuale e ekipit të Alain Giresse kuotohet nga 4.75 deri në 5.50, varësisht prej kompanive të basteve.
Barazimi eventual në Volos sonte e ka kuotën nga 3.30 deri në 3.50.
Kurse, fitorja e vendësve duket më e mundshme pasi këto kompani e kanë vlerësuar atë nga 1.70 deri në 1.77.
Aktualisht, Greqia i prin Grupit 2 të Ligës C me 9 pikë pasi i ka regjistruar 3 fitore nga po aq ndeshje, shkruan “Gazeta Express”.
Kurse, Kosova është e dyta me 6 pikë nga tri ndeshje, prej tyre 2 fitore e 1 humbje.
Ndeshja ndërmjet Greqisë dhe Kosovës do të luhet sonte duke filluar nga ora 20:45.
