Drejtori i departamentit për informim në Ministrinë e Shëndetësisë, Faik Hoti, ka publikuar një grafikë, e cila tregon numrin e personave të prekur me coronavirus në Kosovë.
Deri më tani janë testuar 732 persona, 63 prej tyre kanë rezultuar pozitiv me coronavirus kurse një prej tyre ka humbur jetën ditën e diele.
Komuna e Malishevës ka numrin më të madh të personave të infektuar me Covid-19, kjo komunë ka 21 raste. Pas saj radhitet komuna e Gjilanit me 15 raste, për të vazhduar me Vitinë e cila ka 7 raste.
Ndërsa në Gjakovë janë konfirmuar 5 raste, Prishtinë 4 raste dhe Podujevë 3 raste.
Kurse, komuna e Klinës, Obiliqit, Lipjanit, Suharekës, Ferizajt, Shtimës dhe Vushtrrisë deri në këto momente kanë vetëm nga një rast.
Instituti Kombëtar i Shëndetësisë Publike në Kosovë, u ka bërë thirrje që qytetarët të respektojnë masat e vendosura nga Qeveria në mënyrë që të mos përhapet virusi.
