Dëshmitari i pestë me radhë në rastin e Pjetër Shalës, duke u përgjigjur në pyetjet e Zyrës së Prokurorit të Specializuar, ka përshkruar objektet e shtabit të logjistikës së UÇK-së në Kukës, përmes fotografive dhe skicës që ai kishte bërë gjatë intervistimit nga ZPS në 2019-ën.
Dëshmitari tha se ishte kyçur në UÇK dhe nga dy ushtarë ishte dërguar në shtabin e Kukësit që ai e quante shtabi i logjistikës, dhe sipas tij, në atë vend kishte qenë ushtarë i thjeshtë dhe kishte kryer detyrat e rojës, ku tha se këtë e kishin bërë me ndërrime me ushtarë të tjerë.
Sipas dëshmitarit, kanë pasur vendin e caktuar për roje dhe se shtabit ka pasur tri ndërtesa.
Përmes skicës e cila nuk është paraqitur për publikun dhe fotografike po ashtu jo publike, dëshmitari identifikoi hyrjen (me numrin 5), nga ana e majtë identifikoi vendin ku bënin roje (me numrin 6), dhomën ku flinin ushtarët e thjeshtë dhe oficerët (me numër 4).
Lidhur me dhomat e fjetjes, ai tregoi se ushtarët flinin në katin e dytë, të gjithë në një dhomë, rreth 25-30 persona, kurse në katin e parë oficerët të cilët sipas tij, kishin dhoma të ndara të vogla.
Ai përmes fotografisë identifikoi edhe dritaret e zyrës së Sali Saramantit si dhe më pas magazinën apo deponë (me numrin 2) si dhe ndërtesën ku sipas dëshmitarit mbaheshin njerëzit për 2-3 orë për tu marr në pyetje (me numrin 1).
Për këtë, dëshmitari tha se ishin persona që dyshoheshin se i ka dërguar Serbia për informacione, të cilët tha se UÇK i merrnin në pyetje dhe i lëshonin.
Ndërkaq, në pyetjen se a kishin të drejtë këta persona me ik nga ajo ndërtesë vet, dëshmitari u përgjigj me ‘‘jo, jo s’ka shanca me ik’’.
Ai edhe përmes fotografisë identifikuar të ashtuquajturën ‘‘dhoma hetuese” ku sipas tij, njerëzit mbaheshin për tu marr në pyetje’.
Dëshmitari tha se kjo dhomë nga vendi ku ka bërë roje ka qenë rreth 15-20 metra larg dhe aty kishte shkuar dy herë dhe ajo s’mund të kishte qenë më e madhe se ‘‘5 me 4’’.
Sipas tij, kushtet nuk kanë qenë edhe në gjendje të keqe dhe se dyshemeja ka qenë me dërrasa./PrishtinaPress/
