Gjuriq u kontrabandua përmes një ambulance shëndetësore në veri të Kosovës

Shefi i të ashtuquajturës zyrë për Kosovën, Marko Gjuriq u shfaq sot në inaugurimin e një pike ilegale karburantësh në veri të Kosovës, megjithëse kishte urdhër ndalese për të hyrë në Kosovë.
Edhe pse ende nuk ka një qëndrim zyrtar për rrugët që ka përdorur Gjuriq, nga burime të policisë mësohet se ai është kontrabanduar në orët e hershme të mëngjesit nëpërmjet një ambulance shëndetësore nga Serbia.
“Gjuriq ka përdorur pothuajse mjetet e fundit që i kanë mbetur në dispozicion për të hyrë ilegalisht në Kosovë. Atij i ishte ndaluar edhe herë të tjera hyrja dhe nuk kishte arritur fare në Kosovë. Por kësaj radhe, i ka shpëtuar vëmendjes së policisë duke hyrë në Kosovë nëpërmjet një ambulance shëndetësore në orët e hershme të mëngjesit” ka thënë burimi për KTV-në.
Vetë Gjuriq deklaroi sot se ai ka hyrë në Kosovë ngjashëm sikurse kryeministrit Isa Mustafa, dhe se askush nuk ka të drejtë të ia ndalojë lëvizjen e lirë.
Ministria e Jashtme ia ndaloi dje hyrjen në Kosovë Marko Gjuriqit dhe ky vendim mbetet në fuqi por nuk dihet nëse policia do ta arrestojë apo si do të veprojë më tutje.