Shpeshherë për çiftet kosovare telashet nuk marrin fund me shkurorëzim. Shumë nga ta vazhdojnë të kenë probleme me ish-partnerët e tyre, të cilët nuk arrijnë ta pranojnë ndarjen. Si pasojë e telasheve të vazhdueshme janë gratë ato që kryesisht kërkojnë ndihmën e Policisë.
Një rast i tillë ka ndodhur dje në mëngjes në rrugën “Bujar Syla” në Gjakovë, ku një grua ka denoncuar në Polici ish bashkëshortin e saj me të cilin kishte qenë e martuar për një kohë.
Burimet brenda Prokurorisë kanë bërë me dije se 46-vjeçari dyshohet se vazhdimisht e ka shqetësuar ish gruan, të cilën e ka përcjellë, duke i shkaktuar shqetësim e frikë.
Përballë kësaj situate, ajo ka vendosur që ta raportojë rastin në Polici, ku ka rrëfyer për dhunën psikike që ka përjetuar këtë kohë dhe ka kërkuar urdhër mbrojtjeje.
Si rezultat i denoncimit, njësitet policore janë vënë në lëvizje me ç’rast kanë arritur që ta arrestojnë personin e dyshuar, i cili u shoqërua në stacion policor për intervistim.
Pas përfundimit të procedurave policore, Prokurori i Shtetit ka nxjerrë vendim që i njëjti të ndalohet dhe ndaj tij të iniciohet rasti nën dyshimet për kryerjen e veprës penale ‘Dhunë në familje’.
